Plumbat mbi shtëpinë e shefit të Policisë, ngrihen postoblloqe dhe nisin kontrollet në Lezhë

Policia e Lezhës njoftoi se ka ngritur postblloqe dhe ka nisur krehjen e zonës për kapjen e autorëve që qëlluan me breshëri plumbash mbi shtëpinë e kreut të Qarkullimit Rrugor të Mirditës, Gjovalin Tomës.

Policia e Lezhës informoi paraprakisht se:

Me datë 23.09.2017, rreth orës 01:43, është marrë  njoftim se është qëlluar me armë zjarri në drejtim të banesës së shtetasit Gj.T. 53 vjeç, banues  Ishull Shëngjin në Lezhë, me detyrë shef i Seksionit të qarkullimit rrugor në Komisariatin e Policisë Mirditë.

Për pasojë nuk ka pasur të lënduar në njerëz vetëm dëme materiale.

Në vendngjarje menjëherë kanë mbërritur  grupi hetimor në bashkëpunim me Prokurorinë e Rrethit Gjyqësor Lezhë,  që po hetojnë për zbardhjen e ngjarjes dhe identifikimin e autorëve.

Janë ngritur pika kontrolli si dhe po bëhet krehja e zonës me qëllim kapjen e autorëve të kësaj ngjarjeje