Po vuan në burg, Gjici kërkon lirimin. Gjykata thërret ekspertët për të verifikuar provat

Edhe njëherë tjetër, ish-kryetari i bashkisë së Kukësit, Safet Gjici kërkon lirimin nga burgu. Ai i është drejtuar Gjykatës së Elbasanit me kërkesën për t’u liruar nga burgu për arsye shëndetësore, ndërsa Gjykata shtyu seancën ndaj tij në 11 nëntor ora 13:00, deri në marrjen dhe administrimin e provave shkencore. Aktualisht Gjici ndodhet në regjim spitalor nën kujdesin e punonjësve të IEVP Durrës, ndërkohë që qëndron në burgun e Lushnjës.

Gjyqtarja e çështjes kërkoi që të gjitha provat e paraqitura nga avokati t’i nënshtrohen vërtetësisë. Të sillen të gjitha kartelat mjekësore të Gjicit që nga koha e paraburgimit. Të dërgohet një raport nga IEVP Lushnjë mbi dinamikën e vuajtjes së dënimit të Gjicit. Të sillet një raport vlerësimi nga shërbimi i provës. Kartelat mjekësore do të shqyrtohen nga mjekët ekspertë seancën tjetër. Safet Gjici vuan nga sëmundje kardiovaskulare dhe diabet.

Gjykata pranoi kërkesën e mbrojtjes për pranimin e kërkesës për ekspertim mjekoligjor dhe pranoi kërkesën e prokurorisë për informacion nga IEVP për të gjitha trajtimet mjekësore të Gjicit në kohën që ka qenë i dënuar. Avokatët në kërkesën e tyre janë bazuar në nenin 59/a pika c e Kodit Penal sipas të cilit, për dënime të mbetura nën dy vite mund të lejohet qëndrimi në shtëpi për shkaqe shëndetësore.