Pogradec: Sherr mes dy të rinjve, 18-vjeçari vritet brenda lokalit

Një ngjarje e rëndë, u shënua pasditen e sotme në Pogradec, në nisje të vitit të ri shkollor. Dy shokë u përfshinë në një sherr, i cili përfundoi me pasoja të rënda.

Ngjarja ndodhi në një lokal në rrugën “Rinia”. Burimet thonë se nga të shtënat me armë humbi jetën 18-vjeçari Fabio Hila. I riu u qëllua me automatik dhe ndërroi jetë rrugës për në spital, për shkak të plagëve të marra.

Policia ka arrestuar autorin e krimit, adashin e viktimës, 18-vjeçari Fabio Musollari, si dhe ka sekuestruar armën e krimit tip kallashnikov.

Dy të rinjtë me të njëjtin emër kishin debatuar më herët në telefon dhe më pas autori, 18­ vjeçari Musollari ka shkuar në lokalin ku ndodhej Hila dhe e ka qëlluar me armë. Musollari nga fshati Vërdop, njihej si person problematik. Ngjarja ka ndodhur në prani të dhjetëra personave dhe ka shkaktuar kaos dhe panik.