Policia arreston në flagrancë autori i një rasti zjarrvënieje në fshatin Zallë, në Krujë

Policia e Shtetit ka publikuar në mediat sociale një tjetër rast të zjarrvënies së qëllimshme në Krujë
“Arrestohet në flagrancë autori i një rasti zjarrvënieje në fshatin Zallë”.
Si pasojë e përhapjes së flakëve, pati dëme të shumta materiale edhe në fshatin Halil dhe në vendet e quajtuara “Kodra e Stafukeve” dhe “Kodra e Babasve”, shkruhet në komunikimin me informimin publik, Policia.

Si rezultat i veprimeve të shpejta operacionale, të kryera nga shërbimet e Komisariatit të Policisë Krujë, menjëherë pas njoftimit për një vatër zjarri në fshatin fshatit Zallë, u mundësua arrestimi në flagrancë i autorit të dyshuar të rastit, shtetasit I. H.(K.), 67 vjeç.
Ky shtetas dyshohet se ka ndezur zjarr në sipërfaqen e tokës në pronësi të tij, për të djegur mbeturina bimore.
Zjarri ka dalë jashtë kontrolli dhe si pasojë e përhapjes së tij janë djegur sipërfaqe toke të konsiderueshme dhe pemë frutorë, në fshatin Zallë dhe në zonat përreth.

Materialet procedurale iu referuan Prokurorisë, për veprime të mëtejshme.
Policia e Shtetit apelon në mënyrë të përsëritur, për të gjithë qytetarët, fermerët dhe pronarët apo poseduesit e kullotave, që në asnjë rrethanë të mos ndezin zjarr. Gjithashtu, praktika e gabuar dhe penalisht e ndëshkueshme e djegies së mbeturinave në toka bujqësore ose kullota, përbën rrezik për përhapje të pakontrollueshme të flakëve, si dhe për dëmtim të pronës, shëndetit dhe jetës.
Policia e Shtetit fton qytetarët që të denoncojnë menjëherë, çdo shtetas që tenton të ndezë zjarr, duke iu garantuar anonimat të sigurt, reagim të menjëhershëm dhe konform ligjit.