Policia Rrugore, në 25 ditë 41 mijë gjoba për shoferët

Me ardhjen e stinës së verës, numri i aksidenteve rrugore shtohet ndjeshëm. Duke nisur nga qershori, muaj kur edhe nis sezoni turistik, bilanci i aksidenteve që përgjakin rrugët shqiptare bëhet tragjik. Dhe aksidentet me pasoja fatale nuk kanë munguar as ditët e fundit. Numri i viktimave të aksidenteve është përgjysmuar në korrikun e këtij viti krahasuar me një vit më parë. Sipas të dhënave të policise rrugore, nga dita e parë e këtij muaji deri tani, kanë humbur jetën në aksidente rrugore 11 qytetarë.

Kjo shifër ka qenë dyfish më e lartë në të njëjtën periudhë të vitit të kaluar kur janë regjistruar 22 viktima në rrugë. Edhe numri total i aksidenteve ka pësuar ulje këtë periudhë të vitit me 81 raste më pak se në 2017, ndonëse ka 79 raste të kapjes së drejtuesve të mjeteve në gjendje të dehur më shumë se një vit më parë.

Shkakun policia e shikon te shkelja e rregullave të qarkullimit nga shoferët, por edhe nga këmbësorët. Kryesore është humbja e vëmendjes për shkak të telefonit. Gjoba për telefonin shkon në 1 000 lekë. Në 6 muaj, 10 mijë shoferë janë penalizuar për këtë fakt, ndërsa ka rënie drastike numri i penalizimeve për mospërdorimin e rripit të sigurimit. Një drejtues automjeti që kapet pa rrip penalizohet rëndë dhe duket se kjo ka rritur numrin e atyre që vendosin rripin para se të ndezin makinën.

Në aksidentet me pasoja, këtë vit ka pasur 36 raste të të plagosurve rëndë më pak së një vit më parë ndërsa është shënuar rënie me 73 raste më pak edhe në rastet e të plagosurve lehtë. Sipas policisë rrugore, problematik mbetet fenomeni i drejtimit të makinës në gjendje te dehur, ku këtë vit janë penalizuar gjatë korrikut 163 persona në krahasim me vetëm 84 raste një vit më parë.

Të dhënat zyrtare të qarkullimit rrugor tregojnë për rënie të grupit të kundravajtjeve që kanë të bëjnë me mos vendosjen e kaskes, perdorimin e celularit apo, mos vënien e rripit të sigurimit si dhe parakalimet e gabuara, duke shënuar 6581 raste më pak. Tejkalimi i shpejtësisë është një kundravajte e ndeshur më shpesh këtë vit me 483 raste më shumë. Totali i gjobave për korrikun e këtij viti është 41 mijë e 309 nga 34 mijë 250 që ka qenë vitin e kaluar.