Presidenca bullgare e BE: Ballkani, prioriteti më i rëndësishëm

Presidenca bullgare e Bashkimit Europian ka si prioritet të rëndësishëm ecurinë e Ballkanit Perëndimor. Qëndrimi është ripërsëritur nga ministrja e jashtme bullgare Ekaterina Zaharieva, e cila ka vlerësuar se qëndrueshmëria në rajon nënkupton siguri në mbarë Europën.

Ballkani Perëndimor është prioriteti më i rëndësishëm i presidencës bullgare të Bashkimit Europian. Ishte ministrja e jashtme e Bullgarisë Ekaterina Zaharieva ajo që konfirmoi këtë qasje gjatë një fjalimi të mbajtur në Komitetin e Politikës së Jashtme në Parlamentin Europian, duke theksuar se rajoni ka peshë e rëndësi për të gjithë kontinentin.

Zaharieva paralajmëroi për prezencën e faktorëve të huaj në Ballkanin Perëndimor ndërkohë që pohoi se përgjegjës për këtë fakt është Bashkimi Europian që nuk është mjaftueshëm i angazhuar në rajon.

Ministrja e Jashtme bullgare shprehu besimin e saj se mungesa e stabilitetit dhe sigurisë në Ballkanin Perëndimor përkthehet në paqëndrueshmëri në vetë kontinentin Duke u ndalur në çdo vend të rajonit, Zaharieva u shpreh se presidenca bullgare ka mundësi realiste për të hapur kapituj të rinj në negociatat për anëtarësim të Malit të Zi e Serbisë.

 Sa i përket mungesës së një qasjeje të përbashkët të Bashkimit Europian për Kosovën, Zaharieva theksoi se autoritetet kosovare duhet t’i japin prioritet procesit të reformave veçanërisht në sundimin e ligjit.

Bashkimi Europian nuk do të tolerojë çështjet ende të pazgjidhura në rajon si ratifikimi i demarkacionit mes Malit të Zi dhe Kosovës, apo negociatat mes Maqedonisë e Greqisë lidhur me emrin, sipas Zaharievës. Kjo do të thotë se asnjë vend nuk do të mund të anëtarësohet më në BE, pa çështje dypalëshe të pazgjidhura.