Presidenti Begaj uron për vitin e ri 2024: Viti që lamë pas, rriti reputacionin e Shqipërisë në botë

Presidenti i Republikës, Bajram Begaj ka uruar shqiptarët për vitin e ri 2024. Ai përmendi disa prej arritjeve të vendit gjatë vitit 2023, duke veçuar forcimin e pozitës së Shqipërisë në arenën ndërkombëtare. Begaj bëri thirrje që politika të lërë mënjanë dallimet dhe të përqendrohet për t’u dhënë rëndësi interesave të shqiptarëve.

“Kjo është festa e të gjithëve. Dëshiroj të ndaj me ju disa reflektime. Viti që lamë pas pati zhvillime pozitive, veçoj rritjen e reputacionit të Shqipërisë në botë. Treguam se ndonëse vend i vogël i kemi mundësitë të jemi faktor në rajon e në botë. Këtë vit miliona turistë vizituan vendin tonë. Gjithashtu vijuam angazhimin tonë për anëtarësimin në BE. I bëj thirrje të gjithë forcave politike që pavarësisht dallimeve, tu japin rëndësi interesave të qytetarëve”,- tha Begaj.

“Dua t’u uroj të gjithë shqiptarëve brenda dhe jashtë vendit, një vit të ri të mbarë, të paqtë dhe të begatë”- shtoi Begaj.