Presidenti Trump ndërpret intervistën në “Meet the Press”: Çfarë ndodhi në të vërtetë?

Intervista e zhurmshme u zhvillua më 5 qershor 2026, gjatë një vizite të Donald Trump në Chippewa Falls, Wisconsin, dhe u transmetua të dielën pasardhëse në emisionin e njohur “Meet the Press” (“Takim me shtypin”) të rrjetit NBC.

Gjatë bisedës, Trump deklaroi se do të ishte “i zhgënjyer” nëse Kongresi nuk do të miratonte një financim prej afërsisht 1.8 miliardë dollarësh për një “fond anti-armatimi” (anti-weaponization fund). Ky fond synonte të dëmshpërblente personat që u targetuan nga Departamenti i Drejtësisë nën administratën e ish-presidentit Biden. Megjithatë, meqenëse administrata e tij kishte deklaruar tashmë se “nuk do të vazhdonte” me këtë nismë, moderatorja Kristen Welker e sfidoi atë mbi këtë kontradiktë të hapur.

Situata u tensionua përfundimisht kur Welker nisi ta pyeste mbi pretendimet e tij të rreme rreth zgjedhjeve presidenciale të vitit 2020 dhe përpjekjet për të shpërblyer aleatët politikë, përfshirë këtu pjesëmarrësit në ngjarjet e 6 janarit, të cilët mësyen Kongresin për të bllokuar certifikimin e rezultatit elektoral. Ish-presidenti ngriti sërish pretendime të pabazuara për sulmin në Capitol, duke deklaruar se agjentët e FBI-së “po shoqëronin” protestuesit brenda ndërtesës, si dhe mbrojti ata që kanë pranuar fajësinë për sulme ndaj forcave të rendit. Për më tepër, ai ripërsëriti teorinë se zgjedhjet paraprake për guvernator në Kaliforni ishin “të manipuluara”, duke shtuar se “e njëjta gjë po ndodh sërish tani” atje.

I gjendur nën presionin e gazetares, e cila kërkoi prova konkrete për këto deklarata, Trump shpërtheu në fyerje personale drejtuar asaj dhe institucioneve të shtypit:

“Zgjedhjet janë të korruptuara, ju jeni e korruptuar dhe ‘Meet the Press’ është i korruptuar… ashtu si ABC, CBS dhe CNN,” deklaroi ai, duke iu drejtuar gazetares me fjalët: “Ose jeni e korruptuar, ose jeni e trashë.”

Edhe pse Welker u përpoq të ruante qetësinë dhe të vazhdonte intervistën duke i kujtuar se kishte udhëtuar posaçërisht deri në Wisconsin, Trump u tregua i prerë:

“Kam qëndruar me ju nën shi për një orë. Herë pas herë nën shi, dhe ju kam dhënë kohë të mjaftueshme. Duhet ta rregulloni shtypin tuaj, sepse e dini çfarë? Një vend nuk mund të jetë i madh me një shtyp të pandershëm.”

Fjalët e tij të fundit para se të hiqte mikrofonin dhe të largohej nga vendi i xhirimit ishin: “Le ta mbyllim, sepse m’u rrit mendja (më mjaftoi). Faleminderit, e dashur. Kaloje mirë.”

Pas transmetimit, Welker sqaroi se kishte biseduar privatisht me presidentin të shtunën. Të dy kishin pranuar vështirësitë që shiu kishte sjellë gjatë realizimit të intervistës, ndërsa shtoi se Trump ka rënë dakord parimisht për një tjetër ballafaqim televiziv në të ardhmen.

Sipas medieve amerikane, ky reagim i ashpër ndaj gazetareve gra nuk përbën një rast të izoluar për Trump-in. Vetëm pak ditë më parë, ai kishte nisur një sulm të paprovokuar ndaj gazetares së CNN-it, Kaitlan Collins. Po ashtu, në nëntor të vitit 2025, ai i kishte kërkuar të heshtte Catherine Lucey-t të Bloomberg-ut duke e quajtur “piggy” (derrkuce), ndërsa një muaj më vonë, i ishte kthyer Rachel Scott-it të ABC-së, duke e etiketuar si “gazetaren më të bezdisshme në të gjithë vendin”.

Përgatitit: Albert Vataj / KJ