Prokurorët po i sillen ish-kryeministrit Berisha. Por jo vetëm atij!

Ish-kryeministri Berisha ka lajmëruar se nesër do jetë në Vlorë. Ai vazhdon turin e tij nëpër rrethe kundër Lulzim Bashës, por edhe në Tiranë prokurorët dhe gjykatat po punojnë dosjet e kohës së Berishës si kryeministër.

Sa më shumë rrit numrin e mbështetësve ish-kryeministri në bazën demokrate, aq me shumë nxitojnë në Tiranë disa organe drejtësie.

Koincidencë e çuditshme, por sot vendimi i gjykatës së posaçme të apelit që revokoi vendimin e Kolegjit Penal të Gjykatës së Lartë të para 12 viteve, tregon se do kemi zhvillime të forta, me arrestime VIP.

Ja njoftimi që doli sot nga gjykata e posaçme, ku ndër të tjera thekson se “Gjykata vendosi, të ndryshojë vendimin nr. 60, datë 27.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar, duke pranuar kërkesën e Prokurorit të Posaçëm dhe revokoi vendimin e pushimit nr. 6, datë 14.09.2009 të Kolegjit Penal të Gjykatës së Lartë, duke i kthyer aktet Prokurorit të Posaçëm për të proceduar”, thuhet në vendimin e Apelit të GJKKO.

Hetimi penal ndaj Fatmir Mediut si ish-ministër mbrojtje për dosjen e Gërdecit do hapë udhë e shtigje të tjera drejt ish-kryeministrit Berisha, e me sa duket duan të dalin te familja e tij.

Dënimi i ish-kryeprokurorit të përgjithshëm, Adriatik Llalla para tre ditësh e ka rritur tensionin te VIP-at e politikës nga arrestimet e mundshme.

Sipas burimeve të besueshme, po SPAK-u po heton dy personalitete të larta të politikës, por asnjëri nuk është nga radhët e PS.

Fakti që janë turrur drejt opozitës dhe disa emrave që nuk janë në qeveri, nuk të krijon shije të mirë. Por gjithsesi drejtësia ka filluar.

Ndërkohë me hapjen e hetimit penal ndaj ish-ministrit mbrojtjes Fatmir Mediu, tabela e policit rrugor tregon udhën për te ish-kryeministri.