Protesta kundër faturave afrofe, reagon OSHEE: U organizua nga PD, nuk kemi pasur asnjë ankesë

Ditën e sotme banorët e fshatit Dërmenas në Fier protestuan kundër faturave afrofe që OSHEE iu kishte vendosur, pas heqjes së sahateve, me pretendimin se do të zëvendësoheshin me të rinj.

Banorët u shprehën për Faxnews se nuk kishin mundësi të paguanin faturën prej 6 mijë lekësh të reja që iu kishte ardhur.

Mirëpo OSHEE në një deklaratë zyrtare për mediat shprehet se ka një projekt me Bankën Botërore për zëvendësimin e sahateve, dhe nuk i është vendosur askujt një vlerë më e madhe se konsumi real.

Njoftimi i OSHEE-së:

Sqarim për vendosjen e matësave elektronik, projekt i OSHEE dhe BB  

Lidhur me protestën e sotme ne Povelcë të Fierit e organizuar nga dega PD, sqarojmë se:

Në bazë të projektit të BB në qarkun e Fierit sikurse dhe në disa qarqe të vendit po instalohen matësit e rinj elektronikë. Në Fier janë përllogaritur 6 mijë matësa, ndërsa në Povelcë rreth 100. Aktualisht janë vendosur rreth 4 mijë matësa në këtë qark.

Banorëve u është thënë se nuk do të ketë më matësa induktivë ndaj faturimi për periudhën e vendosjes së matësit do të jetë faturë referuese, e cila në muajt në vazhdim do të sistemohet nëse u është vendosur më shumë sesa kanë konsumuar realisht. Zyrtarisht në drejtorinë rajonale të OSHEE Fier nuk ka asnjë ankesë për mbifaturim.