Protesta për gjuhën shqipe, Marin Mema: Të rinjtë shqiptarë të marrin në dorë fatin e tyre! Është koha për shqiptari

Studentët nga Universiteti i Tiranës e Prishtinës janë grumbulluar këtë pasdite të së hënës në sheshin ”Skënderbej” në Tiranë, për të vijuar me protestën në mbështetje të të rinjëve në Maqedoninë e Veriut, që kërkojnë të drejtën për të realizuar provimet në gjuhën shqipe.

Nën tingujt e ”Kuq e zi je ti”, studentët e Shqipërisë, Kosovës dhe Maqedonisë së Veriut kanë mbërritur para ambasadës së kësaj të fundit në Tiranë, ku do të vijojnë me disa fjalime. I rreshtuar pas banderolës ”Ne jemi bashkë” që është edhe një nga simbolet kryesore të protestës, gazetari Marin Mema tha se askush s’mund ti ndajë. Ai u bëri thirrje të rinjve që të përpiqen çdo ditë dhe të marrin gjërat në dorë pasi Shqipëria ka nevojë për ta.

”Po e nis nga mesazhi që kemi dhënë me këtë banderolë këtu: ne jemi bashkë sepse sot vërtet jemi bashkë përtej çdo partie, çdo force! Kombi është mbi çdo parti, kombi është i shenjtë, kombi është gjaku e shpirti i çdo shqiptari dhe s’ka kurrkush që mundet të na ndajë! Ne do të jemi çdo ditë krah çdo shqiptari në çdo pëllëmbë të trojeve shqiptare, krah vëllezërve tanë në Maqedoni e kudo sepse ne do të jemi një shpirt, një zemër, një histori, një kulturë, një identitet, një gjak, gjak shqiptar, i shenjtë!

Uroj me zemër e shpirt që ne siç jemi sot të gjithë bashkë dhe ju siguroj që jemi shumë bashkë, të përpiqemi çdo ditë, të rinjtë shqiptarë në Shqipëri e kudo është koha të marrin gjithçka në dorën e tyre, është koha që të rinjtë shqiptarë të kthejnë dinjitetin e Shqipërisë dhe trojeve shqiptare! Shqipëria ka nevojë për gjithë këta të rinjtë, shqiptarët kanë nevojë për njerëz që e duan me zemër shqiptarinë ndaj sa më shumë çdo ditë sepse shqiptarinë e bëjnë vetëm ata që e duan vërtet. Është koha për shqiptari, për çdo pëllëmbë të kësaj toke”, tha Mema.