PS zgjedh sot delegatët e Kongresit, për herë të parë aplikohet votimi elektronik

Ditën e sotme Partia Socialiste zgjedh delegatët e kongresit sipas parimit një anëtar, një votë. Mësohet se procesi për zgjedhjen e tyre do të nisë në orën 08:00-16:00, ku 103 056 anëtarë të PS në gjithë vendin do të zgjedhin mes 1 496 kandidaturave, 706 delegatët e Kongresit.

“Janë shpërndarë materialet zgjedhore në të gjithë vendin. Në Tiranë do të ketë votim elektronik.”, është shprehur në një dalje për mediet Alfred Peza. Për herë të parë në këtë proces, në Njësinë Administrative Nr. 8 në Tiranë, do të aplikohen votimi elektronik nga 989 anëtarë partie dhe ai online, nga 100 anëtarë të tjerë.

PS njofton se në të gjithë vendin janë 362 qendra votimi dhe 362 komisione që do të menaxhojnë procesin për zgjedhjet e delegatëve të PS. Në këtë ditë të rëndësishëm për Partinë Socialiste, një vëmendje e posaçme i është kushtuar çështjes së barazisë gjinore, ku 698 kandidate ose 47% e totalit, janë gra.