Publikohen pamjet e grabitjes së armatosur në Kamzë, autorët u larguan me motor (VIDEO)

Janë publikuar pamjet nga grabitja e armatosur e ndodhur mesditën e sotme në Kamëz, ku dy persona kanë grabitur një argjendari në qendër të qytetit.

Në videon e siguruar nga zona shihet momenti kur autorët dalin nga argjendaria me bizhuteritë e vjedhura dhe me armë në duar, ndërsa largohen me shpejtësi me një motor. Të dy personat mbanin skafandra në kokë, çka vështirëson identifikimin e tyre.

Ngjarja ka ndodhur rreth orës 13:00, kur një prej autorëve, i armatosur me pistoletë, është futur në ambientet e argjendarisë dhe, nën kërcënimin e armës, ka marrë disa bizhuteri me vlerë.

Sipas të dhënave paraprake nga policia, grabitësi nuk ka qenë i vetëm. Jashtë biznesit e priste një person tjetër, i cili dyshohet se ka ndihmuar në largimin e shpejtë nga vendi i ngjarjes.

Pas grabitjes, dy autorët janë larguar me motor në drejtim ende të paqartë, ndërsa policia ka ngritur pika kontrolli dhe po punon për identifikimin dhe kapjen e tyre.