Rama: Emigracioni i paligjshëm dhe inteligjenca artificiale në fokus të takimeve në Spanjë

Koordinimi i forcave dhe i kontributit të përbashkët lidhur me emigracionin e paligjshëm ishte në fokus të takimit të zhvilluar sot në Spanjë. Këtë e bëri të ditur kryeministri Edi Rama, në një intervistë televizive nga Granada, ku po merr pjesë në punimet e samitit të tretë të Komunitetit Politik Evropian (EPC).

“Këtu formati është me tryeza të ndryshme. Kemi bashkëdrejtuar së bashku me kryeministrin e Suedisë një tryezë për digjitalizimin dhe inteligjencën artificiale në aspektin e qasjes së qeverive”, tha ai.

Kreu i qeverisë tha edhe se ka pasur një tjetër tryezë me presidenten e Komisionit dhe liderët e Francës, Italisë, Holandës e Britanisë së Madhe për çështjen e koordinimit të forcave dhe të kontributit të përbashkët lidhur me emigracionin e paligjshëm.

“Natyrisht kemi folur edhe për eksperiencat tona të mëparshme në fillim të viteve 2000, që kanë qenë eksperienca të suksesshme në aspektin e koordinimit të qeverive të Italisë dhe Shqipërisë dhe eksperienca të mëvonshme me Francën e Britaninë e Madhe. Në këtë aspekt vazhdon funksionon ky komunitet, një komunitet të barabartësh ku krijohen tryeza, grupe të ndryshme, për të çuar para pjesë të axhendës së përbashkët europiane”, tha Rama.