Rama heq si zv.ministre të Brendshme, Rovena Vodën

Zv/Ministrja e Brendshme Rovena Voda, është larguar nga detyra, me vendim të Këshillit të Ministrave. Largimi i saj është bërë në funksion të organizmit dhe funksionimin e Këshillit të Minstrave, me propozimin e kryeministrit Rama. Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave, vendosi: ”Znj. Rovena Voda, zëvendësministër i Brendshëm, lirohet nga kjo detyrë. Ky vendim hyn në fuqi menjëherë”, thuhet në VKM.

Që prej 22 majit 2017, Voda është emëruar në pozicionin e zv/ministres së Brendshme. Ajo ka marrë pjesë në shumë takime e konferenca ndërkombëtare, si dhe ka kryer një sërë kualifikimesh e trajnimesh. Voda mban gradën Master Shkencor, në “E drejtë private”, Fakulteti i Drejtësisë, Universiteti “Aleksandër Moisiu”, Durrës në vitet 2012-2015. Nga maji i vitit 2004 deri në shtator 2014, Voda ishte Avokate pranë Dhomës së Avokatisë Durrës. Gjatë periudhës qershor – nëntor 2008 punoi si juriste në një bankë private në Durrës.

Në vitet 2010-2011 ka qenë Ndërmjetëse për zgjidhje me ndërmjetësim të konflikteve tregtare në Gjykatën e Shkallës së Parë Durrës. Nga janari i vitit 2008 deri në dhjetor 2012 Voda ka qenë lektore në Universitetin “Aleksandër Moisiu” Durrës, për lëndët: “E drejtë civile”, “E drejtë publike”, “E drejta e detit”, “E drejtë turizmi” dhe “Etika në turizëm”. Nga shtatori i vitit 2014 deri më mars të vitit 2017 Voda ka mbajtur postin e Drejtorit të Kabinetit të ministrit të Shtetit për Marrëdhëniet me Parlamentin. Prej 22 marsit 2017, ajo u emërua në pozicionin e Drejtorit të Kabinetit të ministrit të Punëve të Brendshme.