Kryeministri Edi Rama, në podkastin “Flasim”, prezantoi një tjetër komponent të “Paketës së Maleve”, projektin e quajtur “Porta e Alpeve”, të cilin e cilësoi si një ndërhyrje të rëndësishme për zhvillimin e zonave malore në veri të vendit. Sipas tij, bëhet fjalë për një investim të madh me vlerë rreth 100 milionë euro, i cili do të realizohet në bashkëpunim dhe bashkëfinancim me Bankën Europiane të Investimeve.
Rama theksoi se projekti ka si qëllim kryesor nxitjen e turizmit malor dhe zhvillimin e qëndrueshëm të zonave të Alpeve shqiptare. Ai u shpreh se “Porta e Alpeve” është rezultat i një pune të gjatë dhe synon të krijojë lidhje më të mira mes zonave të veriut dhe pjesës tjetër të vendit, duke përmirësuar aksesin dhe lëvizjen gjatë gjithë vitit.
Në kuadër të projektit parashikohen investime në infrastrukturën rrugore dhe transport, përmirësime në sistemet e ujësjellësit dhe kanalizimeve, si dhe ndërhyrje në zhvillimin urban të zonave përkatëse. Po ashtu, një vëmendje e veçantë do t’i kushtohet restaurimit të trashëgimisë historike dhe kulturore të veriut, si dhe mbrojtjes së natyrës së paprekur dhe peizazheve të veçanta të kësaj zone.
Kryeministri nënvizoi se projekti ka një qasje të integruar, duke mos u fokusuar vetëm në një aspekt të vetëm, por në zhvillimin e përgjithshëm të territorit. Sipas tij, kjo nismë ka potencialin të japë një shtysë të fortë për ekonominë dhe turizmin në veri të Shqipërisë.
Në fund, Rama reagoi edhe ndaj kritikave për mungesë investimesh në veri, duke u shprehur se qeveria aktuale ka bërë dhe do të vazhdojë të bëjë më shumë për këtë zonë se të gjitha qeveritë e mëparshme së bashku, që nga periudha e tranzicionit e deri më sot.