Rama: Nga portet te hekurudha, kantieret që ndryshojnë Durrësin dhe ekonominë e vendit

Kryeministri Edi Rama, në një takim falënderues për rezultatin e zgjedhjeve vendor në Durrës, u ndal te projektet madhore me impakt në zhvillimin jo vetëm të Durrësit, por të gjithë vendit. Rama tha se Durrësi është i rëndësishëm për ekonominë e Shqipërisë.

“Gjithë këto kantiere të mëdha nuk janë vetëm për Durrësin, por për rajonin, gjithë Ballkanin. Kemi portet dhe hekurudhën, realizimi i tyre do të thotë çuarje komplet në nivel tjetër të ekonomisë”, tha ai.

Kryeministri theksoi se porti turistik nuk ndryshon vetëm Durrësin, por ndryshon ekonominë e vendit. “Po kështu porti tregtar e hekurudha. Këto janë punë të mëdha. Pastaj nuk diskutohet që turizmi ka rëndësinë e vetë. Do të transformojmë zonën e plazhit. Ky është vetëm njëri prej projekteve që do bëjë që Durrësi, Shijaku, Kruja e Tirana të funksionojnë si një ofertë e vetme”, shtoi Rama.

Kryeministri u ndal po ashtu te puna që duhet bërë në drejtim të përmirësimit të shërbimeve për qytetarët. Rama u shpreh se nuk është bërë i njëjti revolucion me Kadastrën.

”Te Kadastra duhet të bëjmë një transformim përfundimtar. Është bërë punë, por nuk është më e mjaftueshme. Kadastra është banka e pronave të shqiptarëve dhe ne duhet ta kthejmë në bankë të pronave. Nuk është as e deputetëve, këshilltarëve, drejtorëve dhe e askujt tjetër. Gjithë atë punë voluminoze që është bërë për hartat ne nuk mund ta lëmë të pambaruar”, shtoi Rama.