Rama për gjyqtarët dhe prokurorët: Kanë faje më të rënda se politikanët

Kryeministri Edi Rama, gjatë një bashkëbisedimi me qytetarët në Elbasan, ka deklaruar se prokurorët dhe gjyqtarët kanë faje shumë më të rënda se politikanët.

Rama tha se rezultatet e kërkuara nuk janë ende qartësisht të dukshme, por po çlirohemi nga dhuna e një kaste gjykatësish dhe prokurorësh, që asnjëherë nuk kanë qenë në fokusin e medias apo opinionit publik.

“Te drejtësia kemi arsye të jemi kryelartë, pavarësisht se disa njerëz e kanë padurimin shumë të madh dhe nuk arrijnë të fokusohen për të parë se ajo që kemi bërë ne në këto vite për të pasur një drejtësi funksionale është historike. Është gjëja që mbase vlerësohet shumë herë më pak se ç’vlen në të vërtetë. Rezultatet e kërkuara nuk janë ende qartësisht të dukshme, por po çlirohemi nga dhuna e ftohtë dhe e heshtur por shumë dëmtuese e një kaste gjykatësish dhe prokurorësh, që asnjëherë nuk kanë qenë në fokusin e reflektorëve të medias apo opinionit publik, sepse kanë qenë mbi të gjithë. Nëse politikanët janë bërë objekt bisede e sulmesh 30 vjet rresht, kjo kastë, që ka qëndruar jashtë valës së sulmeve, në raport me Shqipërinë ka përgjegjësi e faje shumë të rënda se politikanët. Nëse kjo kastë nuk do ta kishte mbytur drejtësinë dhe ta kthente atë në një mall që blihet e shitet, edhe politikanët do të kishin qenë shumë më të përmbajtur e të përgjegjshëm. Mungesa e një drejtësie që mban të palëkundur gurin themeltar, ka bërë që ne të vuajmë shumë në të gjitha aspektet dhe pasojat të jenë te më të dobëtit”, tha Rama.

Më tej, Rama tha se procesi i pastrimit të llumit nga sistemi i drejtësisë është jo i lehtë, por premtoi se në mandatin e tretë do të finalizojë disa procese të nisura prej vitesh.

“Jemi të gjithë dëshmitarë se sa shumë burra të denoncuar për dhunë janë liruar nga gjykatat dhe janë fajësuar gratë. Ose në shumë raste dhunuesit pasi janë dhunuar, kanë ridhunuar. Procesi i pastrimit të llumit nga sistemi i drejtësisë është jo i lehtë. Ata që kërkojnë me të drejtë shtet të së drejtës duhet të vetëdijësohen se nuk është një proces që mund të mbyllet në 1 apo 2 mandate, është e pamundur. Në mandatin e tretë ne do të finalizojmë disa procese të nisura prej vitesh, që kërkojnë kohën e tyre”, tha Rama.