Kryeministri Edi Rama ka reaguar në mbështetje të investimeve të huaja në Shqipëri, duke argumentuar se vendi nuk mund të ndjekë një qasje refuzuese ndaj kapitaleve ndërkombëtare në një kohë kur po bëhen përpjekje për të tërhequr investitorë të mëdhenj. Kreu i qeverisë krahason situatën me Greqinë, duke sjellë si shembull ishullin e Mykonosit, ku marka të njohura ndërkombëtare të hotelerisë po investojnë në projekte të reja turistike. Për të ndërsa vendet konkurruese synojnë të tërheqin sa më shumë investime të huaja, në Shqipëri po zhvillohen debate që sipas tij rrezikojnë të pengojnë këtë proces.
Postimi i plotë
Greqia vazhdon “të shitet tek të huajt” me sukses, kurse ne na i kanë futur xixat nga të katër anët që të zihemi mes veti edhe për 1+1 që bëjnë 2, e të vijmë vërdallë në udhëkryq, kur konkurrenca vazhdon vrapin për më shumë investime të huaja.
Po si mund t’ua mbyllim ne rrugët kapitaleve të mëdha, tani që ato po nisin të vijnë në Shqipëri pas tërë mundit të madh që kemi bërë për të ardhur në këtë pikë?! Po tërë bota e zhvillon turizmin dhe ekonominë duke u matur me sa investime të huaja tërheq, ndërsa ne do të matemi me sa rezistojmë kundër tyre?
Kjo është një ftesë për vetëprapakthim kolektiv, që Shqipëria nuk mund, nuk duhet dhe nuk ka për ta pranuar.
Ja përmbajtja e artikullit:
Marka të mëdha ndërkombëtare të hotelerisë po investojnë në Mykonos, ku hotele të reja me pesë yje nga Four Seasons, Fouquet’s dhe MGallery janë planifikuar të hapen së shpejti.
Pavarësisht tensioneve gjeopolitike dhe një sezoni sfidues për turizmin, Mykonos vazhdon të mbetet një nga destinacionet premium më të rëndësishme në Mesdhe. Kompanitë ajrore po rrisin numrin e vendeve të disponueshme në fluturimet ndërkombëtare për sezonin 2026, me një rritje prej 7.1% të kapacitetit hyrës.
Po shtohen gjithashtu linja të reja ajrore nga Roma, Londra, Abu Dhabi dhe Dubai, duke forcuar më tej lidhjet ndërkombëtare të Mykonosit. Një resort i ri me pesë yje, me vlerë mbi 100 milionë euro dhe i lidhur me investitorin egjiptian Naguib Sawiris, pritet të hapë dyert në maj të vitit 2027.