Referendumi për shkarkimin e Bashës, deputeti Këlliçi jep detaje se çfarë do të ndodh nesër

Kreu ende në detyrë i Forumit Rinor të PD-së, Belind Këlliçi ka treguar detaje për procesin e votimit në Referendumin e thirrur nga Sali Berisha për të shkarkuar nga detyra Lulzim Bashën si kryetar i PD-së. Ai informon se në 71 degët e partisë janë ngritur 106 qendra votimi, por 22 të tilla do të jenë të vendosur vetëm në kryeqytet.

“Duke qenë se në selinë e PD-së është uzurpuar nga njerëz të armatosur për të shmangur çdo provokim apo incident, kemi vendosur që Këshilli Kombëtar dhe dega 2 këtë herë s’do votojnë në seli por në ambientet e Bar Amerikës, ngjitur me ambasadën amerikane, aty do të votojë dhe zoti Berisha”, thotë Belind Këlliçi.

Si anëtar i komisionit për rithemelimin e PD-së, ai sqaron se qendrat e votimit do të qëndrojnë të hapura deri në orën 17:00, ndërsa do të numërohen në kohë reale në vendet e votimit dhe rezultati do t’i përcillet komisionit zgjedhor në Tiranë.