Reforma zgjedhore, KSHH: Mungon transparenca nga komisioni

Reforma zgjedhore po ecën me ritme shumë të ngadalta si dhe në tejkalim të afateve. Komiteti Shqiptar i Helsinkut shprehet mjaft kritik ndaj Komisionit Reformës duke e akuzuar edhe për mungesë transparence.

“Pavarësisht se me 13 prill Komisionit i mbaroi mandati, nuk ka asnjë informacion për ndonjë çështje të rëndësishme që mund të jetë arritur me konsensus, nëse ka filluar puna me hartimin e draft amendamenteve në këtë Kod.”

Komiteti Shqiptar Helsinkut duke e bazuar në praktikat e së kaluarës thekson se për shkak të mungesës së konsensusit, partitë e mëdha politike kanë bërë ndryshime në prag të zgjedhjeve.

“Këto ndryshime të hartuara në një kohë të shkurtër, pa një proces transparent dhe gjithëpërfshirës, kanë dëmtuar cilësinë e Kodit dhe nuk kanë marrë në konsideratë rekomandimet e OSBE/ODIHR-it për tre zgjedhjet e fundit. Kjo mund të krijojë përshtypjen se ndryshimet në Kod janë monopol i dy partive të mëdha.”

Përveç depolitizimit të administratës zgjedhore dhe rekomandimit për zbatimin e sistemit elektronik pilot, vëmendje e veçantë i duhet kushtuar edhe propozimeve për ndryshimin e sistemit zgjedhor, votimit të shtetasve shqiptarë jashtë vendit, forcimit të kontrollit dhe burimit të financimit të partive politike, masave për parandalimin e vjedhjes së votës, etj.