Reshjet e dendura të shiut dhe përmbytjet, evakuohen 27 familje në Lezhë

Prej disa ditësh vendi ynë është përfshirë nga reshje të shumta shiu dhe dëbore. Reshjet intensive të shiut kanë bërë që shumë lumenj të dalin nga shtretërit e tyre duke krijuar përmbytje në tokat bujqësore, banesat dhe rrugë.

Qyteti i Lezhës është një prej qyteteve ku reshjet e shiut kanë krijuar jo pak probleme. Mësohet se deri më tani 27 familje janë evakuuar pasi banesat e tyre nuk janë të sigurta.

Nga reshjet e dendura që kanë përfshirë vendin gjatë ditëve te fundit, janë përmbytur 2800 hektarë tokë bujqësore në fushën e Zadrimës, Zejmenit, Rrilës, Tales, Shënkollës. Për shkak të reshjeve të shumta dhe prurjeve të përrenjve është shembur ura në fshatin Kalivaç. Prej 2 ditësh ishte e rrethuar nga uji, por sot është shembur totalisht.

Kjo urë bënte lidhjen e banorëve në fshatin Kalivaç të njësisë administrative Ungrej në Lezhë më qytetin. Shembja e saj dhe i aksit rrugor Kallmet-Ungrej nga reshjet kanë shkaktuar problematika të mëdha për banorët e fshatit Kalivaç. Një pjesë e tyre është tërësisht e izoluar me qendrën urbane të Lezhës.