Riatdhesohen nga Siria 2 gra e 3 fëmijë, mes tyre Myrvete Dibra që u kujdes për nipërit jetimë në Al-Hol

Pas 12 vitesh qëndrimi në Siri, Hajrije Taushani, sot 79 vjeçe, është rikthyer në Shqipëri në kuadër të operacionit të fundit të riatdhesimit. Në vitin 2014, atëherë 67-vjeçare, ajo udhëtoi drejt Sirisë pasi mori lajmin se djali i saj, Sherif Taushani, 35 vjeç, kishte humbur jetën në luftë krah ISIS.

Hajria shkoi në kampin Al Hol me shpresën për të gjetur dhe kthyer në atdhe nipërit e mbesat e saj. Gjatë viteve të qëndrimit në kamp, ajo u kujdes edhe për fëmijë të tjerë që kishin mbetur jetimë nga lufta. Mes tyre ishte edhe një djalë 9-vjeçar, të cilin e mbajti për dore gjatë kthimit në Shqipëri. Nga fëmijët e djalit të saj të ndjerë, Hajria mundi të rikthejë vetëm mbesën 17-vjeçare. Ende nuk dihet fati i fëmijëve të tjerë dhe bashkëshortes së Sherif Taushanit, të cilët ishin larguar bashkë me të drejt Sirisë.

Hajrije Taushani dhe dy fëmijët u kthyen së bashku me Myrvete Dibrën dhe një vajzë të mitur. Ata mbërritën në Rinas në orën 01:20 të 26 gushtit, pas udhëtimit nga Siria drejt Stambollit dhe më pas drejt Tiranës. Të riatdhesuarit do të jenë nën mbikëqyrjen e autoriteteve shqiptare dhe do të asistohen nga psikologë gjatë procesit të riintegrimit në shoqëri, ndërsa do të ndiqen edhe nga strukturat e antiterrorit.

Me pesë shqiptarët e kthyer në këtë operacion, numri i shtetasve të riatdhesuar nga Siria ka arritur në 43. Autoritetet shqiptare vijojnë kontaktet me palën siriane për kthimin e shtetasve të tjerë. Sipas të dhënave zyrtare, në Siri dyshohet se ndodhen ende 17 shqiptarë në kampe, kryesisht gra dhe fëmijë, si dhe 10 burra në burgje.