Rivlerësimi i pasurive të paluajtshme pas zgjedhjeve të majit, si do të caktohen çmimet e reja të referencës

Pas shtyrjes për vitin e ardhshëm të rivlerësimit të pasurive të paluajtshme, burime nga Ministria e Financave bëjnë të ditur për News24 se rivlerësimi i pasurive do të bëhet pas zgjedhjeve të 11 Majit.

Por për të arritur deri këtu, Ministria e Financave do të hedhë për konsultim publik çmimet e reja të referencave të banesave në të gjithë Shqipërinë

Këto çmime të reja të referencës pritet të përfundojnë në muajin Mars. Miratimi i çmimeve të reja të referencës do të përafrojnë vlerën e pronës me çmimin real të tregut. 60 bashkitë në vend kanë vetëm një çmim reference, sipas qyteteve për të gjitha banesat pavarësisht rëndësisë së zonave ku janë.

Ministria e Financave mësohet se po punon që çmimet e referencës të bëhen përmes një ndarje në zona kadastrale siç aktualisht funksionon në Tiranë.

Nëse një qytetar vendos të shesë sot pronën e tij do të paguajë 15% tatim për diferencën midis vlerës së regjistruar të pronës dhe vlerës me të cilën është shitur, kurse me rivlerësimin tatimi do të jetë më i ulët.

Më herët kryeministri Edi Rama është shprehur për një tatim prej 5% por shifra përfundimtare ende nuk është vendosur.