Roland Bejko takim me banorë të zonës së Freskut: Mos e çoni votën dëm për Ilir Metën

Kandidati i Partisë Demokratike për bashkinë e Tiranës në zgjedhjet e 14 Majit, Roland Bejko zhvilloi sot takime me banorë në zonën e Freskut, ku u zotua për uljen e taksës së ndërtimit nga 12 % në 5 % me qëllim, siç tha ai, që të ndihmohet në uljen e çmimit të banesave.

“Sot me paret që ka pastruar krimi i organizuar në Shqipëri 1.6 mld euro, çmimi i banesave ka vajtur në stratosferë. Askush nga këto djemtë dhe vajzat e reja, nëse do të lidhin kurorë nuk kanë ku të strehohen, se çmimet janë aq të larta sa që ju duhen 4-5 jetë ta blejnë një shtëpi të tillë. Ne do ta marrim taksën 3 % nga ndërtimet, në para dhe në objekt me qëllim që çiftet e reja, nënat kryefamiljare dhe të pastrehët e Tiranës të kenë mundësi ku të strehohen”, tha Bejko.

Prioritet do të jenë, sipas tij, edhe zonat ruale, ku Bejko angazhohet për ndërtimin e 250 kilometrave rrugë rurale, në mënyrë që fermerët vendas ta kenë më të lehtë aksesin në 5 tregjet që do të ndërtohen në hyrje të Tiranës. Po ashtu do të krijohen edhe tri zona të lira ekonomike, në Kërrabë, Arbanë dhe Ndroq.

Në fund, Bejko u bëri thirrje të gjithë qytetarëve dhe demokratëve që të dielën të votojnë numrin 9 dhe 6, në mënyrë që të mos e çojnë votën dëm për Ilir Metën.