Rruga me gjatësi 7 km nuk njeh investime prej vitesh

Rruga tradicionale që shkon nga Durrësi në Shijak me gjatësi 7 km nuk ka njohur investime prej vitesh. Në të dyja anët e rrugës janë vendosur biznese të shumta. Banorët e zonës kanë protestuar disa herë.

Kjo rrugë është kthyer në një shqetësim të përditshëm për banorët, bizneset dhe këdo që është i detyruar të përshkojë këtë segment, që vetëm rrugë nuk mund të quhet më. Disa muaj më parë, banorët u mbushën me shpresë se më në fund autoritetet kishin vendosur të vinin dorë mbi këtë aks por me sa duket premtimet e bëra tani duken si vegime, të cilat dyshojnë nëse i kanë dëgjuar me të vërtetë apo i kanë ëndërruar.

Ndërkohë që autoritetet premtojnë dhe pas ceremonive të rastit braktisin çdo gjë, janë banorët dhe përdoruesit e përditshëm të kësaj rruge që vazhdojnë të vuajnë edhe pse paguajnë çdo taksë që shteti ka vënë ndaj tyre.