Rruga Vllahinë–Poçem pëson dëmtime, automjetet kalojnë me kujdes

Vetëm dy vite pas përfundimit të punimeve, rruga Vllahinë–Poçem ka pësuar dëmtime të konsiderueshme, duke ngritur pikëpyetje mbi cilësinë e ndërhyrjes së kryer.

Në disa segmente të aksit, asfalti është çarë dukshëm, duke krijuar plasaritje të gjata dhe në disa raste të thella, të cilat shtrihen në një pjesë të konsiderueshme të gjatësisë së rrugës. Dëmtimet janë të dukshme si në korsinë kryesore të lëvizjes, ashtu edhe në anësore, duke e bërë qarkullimin e mjeteve të vështirë dhe të rrezikshëm, veçanërisht gjatë orëve të natës apo në kushte të pafavorshme atmosferike.

Banorët dhe drejtuesit e automjeteve shprehen se situata është përkeqësuar gradualisht, ndërsa mungesa e ndërhyrjes së menjëhershme mund të çojë në degradim të mëtejshëm të segmentit. Çarjet në asfalt jo vetëm që dëmtojnë automjetet, por rrisin edhe rrezikun për aksidente.

Ndërkohë, pritet një verifikim i gjendjes në terren dhe marrja e masave për riparimin e dëmtimeve, në mënyrë që të garantohet siguria e përdoruesve të këtij aksi rrugor.