Rrugëtimi i drejtuesit të Kuçovës: Pengjet e së shkuarës, frymëzimi për vizionin e së ardhmes

Shkruar nga: Kejsi Demiraj

Në një qytet të vogël, ku historia e industrializimit dhe sfidat sociale janë të pranishme në çdo rrugicë, rruga e jetës së Sybi Shehut duket si pasqyrim i këtyre ndryshimeve. I lindur në Kuçovë, verën e vitit 1982 dhe i rritur po në atë qytet, ai flet me nostalgji për vitet e rinisë, për pengjet e ndodhitë që i kanë formuar karakterin, dhe për rolin vendimtar që familja dhe përkushtimi i tij kanë luajtur në jetën e tij personale, por edhe atë profesionale.

Rritja dhe formimi i tij janë të lidhur ngushtë me vlerat që i transmetuan prindërit. “Ata kujdeseshin shumë për ne, pavarësisht nga mundësitë e kufizuara të kohës. Sakrifikuan për të na dërguar në shkollë. Shkolla e mesme ishte një arritje e madhe për ta,” kujton ai, duke theksuar se këto përpjekje e kanë bërë të kuptojë rëndësinë e arsimit dhe të sakrificës, dhe kanë qenë mësime që e kanë ndjekur gjatë gjithë jetës, duke shërbyer si baza e parimeve mbi të cilat ndërtoi rrugëtimin e tij.

“Një ndihmë e madhe ka qenë bashkëshortja ime, e cila më ka lehtësuar nga disa detyra, veçanërisht ato që lidhen me aktivitetin politik dhe shoqëror. Ajo ka mbajtur një pjesë të madhe të përgjegjësive familjare, duke plotësuar boshllëkun tim,” shprehet ai me respekt të thellë për të shoqen. Për Sybiun, mbështetja e bashkëshortes nuk ka qenë vetëm një ndihmë praktike, por një shtysë e rëndësishme dhe motori për të vazhduar angazhimet e tij, pa u ndalur asnjë çast.

Megjithatë, një peng mbetet nga vitet e rinisë: pamundësia për të vazhduar studimet e larta pas përfundimit të shkollës së mesme. “Nga vitet 79-83 nuk pata mundësi të ndjek shkollën e lartë për shkak të situatës ekonomike të familjes. Sot e kam përfunduar, por me vonesë,” rrëfen ai. Ky peng ka ushqyer vendosmërinë e tij që të mos e përsërisë të njëjtin boshllëk me fëmijët e tij: “Të tre fëmijëve të mi u kam dhënë mundësinë për të marrë minimumin e arsimit që unë nuk pata.”

Sybiu ka zgjedhur të studiojë në degën e historisë dhe gjeografisë dhe më vonë në atë të inxhinierisë së ndërtimit me korrespondencë, por edhe kjo përpjekje u ndërpre nga ndryshimet e sistemit gjatë viteve të hershme të demokracisë. Ai përmend sfidat e kohës: “Isha i përkushtuar ndaj studimeve dhe karrierës, por ndryshimet e sistemit krijuan pengesa të mëdha. Megjithatë, më vonë kreva shkollën e lartë në Elbasan, në degën e shkencave shoqërore.”

Puna e hershme si teknik zbatimi në Elbasan ka qenë një shkollë e vlefshme për të: “Në atë kohë, puna kërkonte përgjegjësi maksimale. Nuk kishte mundësi justifikimi. Duhej të jepje llogari për çdo detyrë të papërfunduar, ekonomikisht apo ligjërisht.” Ky përkushtim ndaj detyrës dhe disiplinës profesionale ka qenë shoqëruesi i tij përgjatë gjithë karrierës.

Emërimi si nënprefekt i Qarkut Berat ishte një hap dhe arritje e rëndësishme. “E prita me kënaqësi. Angazhimi im ka qenë të ndryshoj diçka për mirë, sidomos në marrëdhënien e qytetarëve me institucionet dhe në zgjidhjen e konflikteve për pronat dhe përgjegjësitë ligjore.” Që nga viti 2019, si nënkryetar i bashkisë Kuçovë, Sybiu ka mbështetur dhe udhëhequr projekte konkrete që prekin drejtpërdrejt jetën e qytetarëve, si përmirësimi i infrastrukturës në zonën e Lumasit dhe legalizimi i ndërtimeve në zonat naftëmbajtëse. “Zona e Lumasit ishte shumë e neglizhuar. Sot, falë investimeve tona, ajo është në nivel të barabartë me njësitë e tjera administrative. Legalizimi i ndërtimeve është një projekt që kërkon ndryshime ligjore dhe ndikim institucional, por është i domosdoshëm për të certifikuar investimin e qytetarëve.”

Me një vetëdije të jashtëzakonshme për të gjitha problematikat e komunitetit të tij, ai thekson se sfida më e madhe për Kuçovën mbetet papunësia dhe nevoja për rritje profesionale në sektorin e naftës. “Dy ndërmarrjet shtetërore mbajnë pjesën më të madhe të punësimit, por duhet të zëvendësojmë punonjësit që dalin në pension me specialistë të rinj. Ky është një problem që kërkon veprim të shpejtë.”

Sybiu shprehet se politika lokale ka ndikim të madh në jetën e qytetarëve: sa më agresive të jetë, aq më të komplikuara janë zgjidhjet. Për të, kultura politike dhe respekti ndaj qytetarëve janë thelbësore: “Qytetarët i trajtoj pa asnjë lloj bindjeje politike. Duhet t’i japim përgjigje të sinqertë dhe argumente të qarta.”

Sa i takon vizionit për të ardhmen, ëndrra e tij për qytetin është e thjeshtë, por ambicioze dhe largpamëse: të investohet dhe të zhvillohet Kuçova përmes punës dhe angazhimit të secilit qytetar. Vetëm investimi dhe përkushtimi i komunitetit, sipas Sybiut, mund të sigurojë një të ardhme të qëndrueshme për qytetin. “Kuçova nuk bëhet me emra politikanësh, por me ndihmën dhe përpjekjen e të gjithë atyre që e duan qytetin,” thotë ai.

Përtej detyrimeve zyrtare, ai mbetet një qytetar aktiv, i lidhur fort me jetën e përditshme të bashkëqytetarëve të tij. Ai beson se modeli i drejtuesit nuk duhet të mbështetet vetëm te pushteti, por te shembulli personal. Me shembullin e tij, Sybiu tregon se integriteti dhe transparenca janë çelësi për të ndërtuar besim mes qytetarëve dhe institucioneve.

Rruga e Sybiut, e cila kalon përmes përkushtimit që në rini dhe sfidave ekonomike deri te drejtimi i projekteve konkrete dhe mbështetja e qytetarëve, është një shembull se përkushtimi, vlerat familjare dhe pasioni për komunitetin mund të bëjnë ndryshimin.