Safet Gjici në gjyq: Mora dënimin për gabimin që bëra! Rash në kurth, por s’kam shkelur ligjin

Ish-kreu i Bashkisë së Kukësit, Safet Gjici doli këtë të hënë në gjyq, ku tha se ka rënë në kurth. Para trupës gjykuese, ai shtoi se u ndëshkua për gabimin që ka bërë dhe mori dënimin. Sa i takon tenderit për qentë, Gjici thotë se nuk e ka shkelur ligjin.

“Unë u ndëshkova për veprimin që kam bërë, unë e mora dënimin për gabimin që kam bërë. Nuk ka projekt, nuk kemi parë projekt, nuk kam shkelur ligjin. Rashë në kurthin e atyre që s’më duan, nuk kam kryer shkelje ligjore jam dakord me qëndrimin e avokatit”, ka thënë Gjici.

Gjykata e Posaçme Kundër Korrupsionit dhe Krimit të Organizuar vendosi që të lërë në masën e sigurisë ”arrest me burg” Safet Gjicin, dhe në ”arrest shtëpie” Alma Kaçin.

Gjici dhe Kaçi akuzohen për korrupsion për një tender për qentë e rrugëve. Ndaj Safet Gjicit rëndon akuza për veprën penale ”Korrupsioni pasiv”, ndërsa për Almën ”Korrupsioni aktiv”. Të dy kanë pretenduar se kishin një lidhje intime me njëri-tjetrin përpara se të flisnin në zyrën e shtetit për tender e favorizime dhe pasi kishin kryer marrëdhënie intime.

Avokatja e 40-vjeçares tha për mediat se nuk duhet të ketë masë sigurie për Almën, pasi ajo ka një fëmijë të mitur 12-vjeç dhe nënën e sëmurë, dhe është e vetmja që sjell të ardhura në familje. ”Përfundimisht i kërkova gjykatës që klientja ime të jetë pa masë ose në ndryshim nga arresti shtëpie të jetë me detyrim paraqitjeje. Sepse ka një fëmije të vogël 12-vjeç si dhe ka të nënën sëmurë. Ajo është e vetmja që sjell të ardhura në familje”,-tha avokatja.

40-vjeçarja e kishte vendosur mekanizmin përgjues brenda gotës prej kartoni me pije freskuese. Gjici ruhej dhe tregohej mjaft i kujdesshëm për njerëzit që futeshin në zyrën e tij. Ai i kishte kërkuar Almës që çelësat e makinës dhe celularin t’i linte në sekretari, por ajo kishte arritur që të vendosë kamerën brenda gotës dhe filmoi të gjithë aktin seksual.