Mbyllja është kriza e PD, thotë Bravaldi Xhafka, ish-sekretari organizativ i degës në Korçë. Për të partia duhet të ndryshojë komunikimin me demokratët dhe kryetarin. Siç shumë demokratë të tjerë para tij kanë pohuar, PD nuk ka luksin të përjashtojë njerëz.
”Do të ishte dëshira ime të garonte kushdo që ka një platformë, një vizion, të jetë një garë e hapur dhe e ndershme. Ajo që e largon demokratin nga gara është vota dhe s’ka asgjë të keqe të ndeshemi me votë, është shumë normale dhe demokratike të garosh. Sigurisht që PD po kalon një krizë dhe kjo nis me mbylljen e PD, si rrjedhojë e komandimit të saj dhe kjo frymë nuk i ka sjellë demokratëve dhe PD, përkundrazi, ne jemi në humbje, opozitë dhe duhet ndërruar kjo mënyrë komunikimi me demokratët dhe të vendoset një kryetar i ri. Nuk e kemi luksin të përjashtojmë apo anatemojmë njerëz, qëllimi i të gjithë demokratëve është të mundim Edi Ramën”, tha Xhafka.
Gara e mbyllur bën që të humbasë shpresa për fitoren, shprehet Xhafka. Ai thekson se është shumë e nevojshme që të garojnë njerëz me vizion dhe për këtë, nuk pendohet aspak që ka përkrahur foltoret e Ervin Salianjit, edhe ai i përjashtuar. Xhafka thotë se Salianji ka kontribut të fortë në PD pasi ka bërë edhe burg për të. Ndonëse nuk ka pasur komunikim të drejtpërdrejtë me Salianjin, Xhafka ka besim te platforma e tij që ka ngjallur besim te demokratët. Ai evidenton pjesëmarrjen e lartë te Salianji, ndërsa nëse kujtojmë foltoret e Berishës, numri shihet gjithnjë e më në rënie.
“Lëvizja e Salianjit ka treguar që ka mbështetje goxha të madhe, në çdo qytet ka pasur pjesëmarrje masive. Jam i bindur që ai ka një platformë serioze, në favor të demokratëve dhe mendoj se do t’i shkojë deri në fund”, tha Xhafka për ”Report Tv”. E gjithë atmosfera dhe fryma brenda PD ka shkaktuar pakënaqësi te demokratët, aq sa Xhafka thotë se ndërsa vetë nuk e ka përjetuar regjimin e diktaturës, po e sheh brenda partisë.