Sanksione për vonesat në shpronësime – Planet për investimet publike, fatura për ata që preken që në nisje të projektit

Investimet publike duhet të shoqërohen me faturën e shpronësimeve që në fillim të nisjes së projektit, me qëllim shmangien e vonesave në implementimin e projekteve, pro edhe problemeve sociale e politike”. Kërkesa është bërë nga deputeti Ilir Beqaj, gjatë diskutimeve të projektbuxhetit të vitit 2020, i cili iu referua problemeve të krijuara te Unaza e madhe.

Sipas ministres, Anila Denaj kjo çështje pritet të adresohet nga Agjencia e Shpronësimeve, një institucion që pritet të miratohet këtë javë në qeveri. Sipas Denajt, në skemën e shpronësimeve do të vendoset plani i pagesës, plus normën e interesit për vonesën.

Diskutime pati edhe për zvarritjen disa vjeçare të rrugës Qukës-Qaf Plloçë, një aks që do të shkurtonte ndjeshëm aksesin e pjesës juglindore të vendit. Sipas Denajt, aktualisht po saktësohet vlera që nevojitet për përmbylljen e projektit, ndërkohë që në momentin që do të ketë një konkluzion do të bëhet kërkesa për financim të huaj.