Sarandë, nisin punimet për rikonstruksionin e rrugës hyrëse

Kanë nisur punimet për  rikonstruksionin e rrugës hyrëse në qytetin e Sarandës, investim i Autoritetit Rrugor Shqiptar me një shumë prej 280 milionë lekësh.

Rruga nis nga Ura e Gajdarit për të përfunduar tek Rrapi në Sarandë. Projekti nis zbatimin pas shumë vjetësh ankesa të sarandiotëve që lëvizin në këtë aks aspak dinjitoz për një qytet turistik. Nisjen e punimeve e ka njoftuar deputeti i sarandës, Alket Hyseni.

Alket Hyseni: “Kemi diskutuar modalitet për çështjen e mbikalimeve dhe nënkalimeve në këtë rrugë për ti dhënë mundësi banorëve që të mos rrezikojnë jetën e tyre dhe të fëmijëve për të kaluar nga njëri krah në krahun tjetër të rrugës.”

Sipas inxhinierit Aristotel Koçi, rruga është projektuar të jetë 10.5 metra e gjerë, me tre korsi si dhe me trotuarë nga të dyja anët.

Aristotel Koçi: “Rruga do të ketë gjerësi 10.5 metra me asfalt, me 3 korsi, trotuare në të dyja krahët, ndriçim, gjelbërim etj.”

Afati i përfundimit të punimeve për këtë aks me gjatë 1 kilometër është 12 muaj.