Sefa: Partia Demokratike ka dëmtuar thelbin e protestës

Avokati Indrit Sefa, thotë se Partia Demokratik nuk e ka ndihmuar, por përkundrazi e ka dëmtuar thelbin e protestës. Ai u shpreh se protesta fillimisht kishte një karakter më të natyrshëm dhe përfshirës, ku qytetarët ndiheshin të përfaqësuar dhe shihnin aty shqetësimet e tyre. Sefa nënvizon edhe në atë fazë mungesa e një drejtuesi e bënte më të vështirë për pushtetin ta identifikonte dhe ta godiste organizimin.

”Unë nuk shoh protestë të organizuar nga Partia Demokratike. Madje, mendoj që PD-ja e ka dëmtuar thelbin e protestës. Ditët e para, protesta ishte shumë e bukur, tërheqëse, të gjithë qytetarët e panë veten në atë protestë, pjesë të asaj proteste. Shikonin që po transmetohej edhe halli i tyre aty. Më pas, Rama nisi me antimitingje si Ramiz Alia dhe e pashë realisht të rrezikuar Ramën në ato momente, sepse nuk po dinte si t’i përgjigjej. Sot, Edi Rama di si të përgjigjet, e ka planin të qartë.

Javën e parë kërkonin me patjetër një drejtues. Sa doli një drejtues, i numëruan edhe lugët në shtëpi atij të shkretit. Protesta pati suksesin maksimal kur nuk kishte drejtues sepse Sigurimi i Shtetit nuk dinte se kë grup duhet të godiste. Pankartat e të rinjve ishin forma më e lartë e protestës, ironia ishte në nivelet maksimale, duke e bërë protestën shumë tërheqëse për të gjithë. Kur u bë në nivel politik, nuk e kuptoj pse u shpreh opozita. Nuk e kuptoj pse u angazhua. Protesta duhej të lihej të bënte punën e vet ashtu siç nisi”,-tha Sefa.