Sekretarja Braverman nis një “luftë” kundër avokatëve: Krijojnë histori të rreme për azilantët

Sekretarja e Brendshme, Suella Braverman e njohur për qëndrimet kundër emigrantëve, tani i ka shpallur “luftë” avokatëve që ndihmojnë azilantët të fitojnë të drejtën për të qëndruar në Britaninë e Madhe.

Ajo tha se disa avokatë po paguheshin deri në 10,000 £ për të krijuar histori të rreme për azil për emigrantët e paligjshëm. Ndaj është ngritur një Task-Forcë për të identifikuar “mashtruesit”, siç ajo i cilëson.

“Këto mashtrime e bëjnë shumë më të vështirë largimin e njerëzve që nuk kanë të drejtë të jenë këtu dhe ata duhet të përballen me forcën e plotë të ligjit. Dua të shoh shkelësit më të këqij në burg dhe ne kemi ligjet në fuqi për t’i sjellë ata para drejtësisë. Unë e di që ekipet tona po punojnë jashtëzakonisht shumë për të çrrënjosur ata që sulmojnë sistemin tonë të azilit dhe mashtrojnë publikun britanik, kjo nuk mund të vazhdojë”, tha Braverman.

Task-Forca ka punuar në fshehtësi prej muajsh, por ekzistenca e saj u konfirmua zyrtarisht vetëm sot. Task-Forca bashkon vëzhguesit, organet e industrisë ligjore, departamentet qeveritare dhe forcat e zbatimit të ligjit për të mbledhur prova më të forta kundër avokatëve të dyshimtë.