Sekretarja e Brendshme britanike, Yvette Cooper: Ekstremizmi islamik dhe ai i djathtë kërcënimet më të mëdha për vendin

Sekretarja e Brendshme britanike, Yvette Cooper, ka deklaruar se ekstremizmi islamik dhe ai i ekstremit të djathtë mbeten “kërcënimet më të mëdha” për vendin, ndërsa po afrohet përvjetori i 20-të i sulmeve terroriste të 7 korrikut 2005 në Londër.

Më 7 korrik 2005, katër sulmues vetëvrasës goditën rrjetin e transportit të kryeqytetit, duke vrarë 52 persona dhe plagosur mbi 770 të tjerë në tre trena të metrosë së Londrës dhe në një autobus.

Duke shkruar në “Sunday Mirror”, Cooper kujtoi se si e mësoi lajmin për sulmet, ndërsa po shkonte në një konferencë të qeverisjes vendore në rolin e saj të atëhershëm si ministre e re.

“Programi anti-radikalizim ‘Prevent’u bë më i rëndësishëm se kurrë”, tha Cooper.

“Dhe komunitetet në të gjithë vendin ishin të vendosura se urrejtja nuk do të fitonte. Puna e bërë në atë kohë ka vazhduar dhe ka evoluar. Terrorizmi ekstremist islamik mbetet kërcënimi më i madh, i ndjekur nga terrorizmi ekstremist i krahut të djathtë”, shtoi ajo.

“Por, ne gjithashtu përballemi me kërcënime nga shtete armiqësore, krim të organizuar serioz, kriminelë kibernetikë dhe një rritje të individëve të radikalizuar në internet”, theksoi Cooper.

Në prill, legjislacioni që ofron mbrojtje më të madhe për të ndihmuar në parandalimin dhe reduktimin e dëmit nga sulmet terroriste në vendet e ngjarjeve u bë zyrtarisht ligj.