Shano: Filloi si Parlament guerrilësh, por bëri atë që “i deshi qejfi” mazhorancës

Pas 2 viteve mungesë, në shtator opozita (PD-LSI), do të rikthehet në Kuvend. Për dy vite opozita zëvëndësuese u bë ”shërbëtore” e PS-së dhe votoi symbyllur çdo ligj të maxhorancës. Analisti Dritan Shano, thotë se Parlamenti ka bërë nga fillimi deri në fund, atë që ka dashur. Vendimi për daljen e opozitës nga Kuvendi, për të ishtë një vendim unanim, por që nuk rezultoi i suksesshëm se këputja me mandatet ndodhi.

“Ky parlament bëri atë që i deshi qejfi mazhorancës, nga dita e parë deri ditën e fundit, pavarësisht se çfarë ndodhi në midis. Ai filloi si parlament guerrilësh, vazhdoi mandej si një parlament me personazhe nga komeditë e Molierit dhe arriti derisa të shkarkojë kryetarin e shtetit.

Opozita doli nga Parlamenti. Unë jam një nga njerëzit që kam mbështetur daljen e opozitës nga Parlamenti. Atje brenda Basha kishte të drejtë kur tha pati një vendim unanim.

Tentativa për ta këputur atë sjellje violente të mazhorancës nuk rezultoi e suksesshme sepse këputja me mandatet ndodhi, por nuk ndodhi me aktorët, me mënyrën e të bërit politikë që është sot e kësaj dite po e njëjta.

Ky parlament demonstroi edhe papërgjegjshmërinë totale ndaj qytetarit në hartimin e listës sa i përket cilësisë së përfaqësimit që duhet çuar në Parlament nga partitë politike”.