Shehu: S’mund të hyjmë në BE në një karrocë me Serbinë! Ministri Hoxha: Nuk preket anëtarësimi

Deputeti i PD-së, Tritan Shehu zhvilloi një interpelancë në Kuvend me ministrin për Europën dhe Punët e Jashtme, Ferit Hoxha, lidhur me artikullin e përbashkët të botuar në muajin shkurt të këtij viti nga kryeministri Edi Rama dhe Presidenti serb Aleksandër Vuçiç në prestigjiozen gjermane “Frankfurter Allgemeine Zeitung”, ku propozonin një qasje të re për integrimin në BE.

Teksa theksonin rëndësinë dhe përfitimet e dyanshme nga anëtarësimi, Rama dhe Vuçiç shpreheshin në artikull se Shqipëria dhe Serbia pranonin të bëheshin pjesë e BE edhe pa të drejta vetoje, pa komisionerë shtesë dhe pa prekur strukturat vendimmarrëse të unionit. Gjatë fjalës së tij në Kuvend, Tritan Shehu është shprehur se editoriali i propozuar nga qenë vendimmarrje personale e kryeministrit Edi Rama dhe Aleksandër Vuçiç.

Sipas Shehut, Rama dhe Vuçiç synojnë që të fusin nga dritarja në BE ato që ai i cilësoi si regjime autoritare në Shqipëri dhe Serbi. Për Shehun, artikulli i botuar nga Rama dhe Vuçiç për prestigjozen gjermane, bie ndesh me rezolutat e miratuara më herët në Kuvend, ku shprehet qartësisht vullneti për anëtarësimin e plotë në BE. Për të Shqipëria nuk duhet të pretendojë që të hyjë në BE në një ‘karrocë’ me Serbinë, e cila sipas tij i ka sytë nga Rusia dhe kërkon të ‘godasë’ në çdo dimension Kosovën.

Nga ana tjetër, ministri Hoxha është shprehur se propozimi i Ramës dhe Vuçiç synon që ta bëjë më të prekshme e të besueshme rrugën e anëtarësimit për Shqipërinë, Serbinë, por edhe vetë BE-në. Sipas Hoxhës në artikullin e botuar nga Rama e Vuçiç për median gjermane, propozohej një rrugë e përshpejtuar dhe fleksibël që lejonte afrimin gradual me strukturat kryesore të BE-së përpara anëtarësimit. Propozimi i Ramës dhe Vuçiç, për Hoxhën nënkuptonte që vendet aspirante të përfitojnë më herët, përpara anëtarësimit, disa prej avantazheve kyçe të anëtarësimit në BE, kryesisht në fushën ekonomike dhe lëvizshmërinë.