Drejtori i Përgjithshëm i Burgjeve, Adriatik Kupi, ka thirrur Komisionin e Disiplinës për të shqyrtuar incidentin e ndodhur në burgun e Fierit, ndërsa sot pritet të merret vendimi për masat ndaj efektivëve të përfshirë.
Sipas burimeve, institucioni i vuajtjes së dënimit në Fier ka propozuar largimin nga detyra të 6 efektivëve, ndërsa për 2 të tjerë është kërkuar pezullimi.
Komisioni i Disiplinës do të shqyrtojë masat e propozuara dhe do të vendosë nëse ato do të miratohen.
Ndërkohë, për të burgosurit e përfshirë në konflikt është propozuar një masë shtesë disiplinore me kohëzgjatje prej tre muajsh.
Paralelisht me procedurën disiplinore, Prokuroria e Fierit ka nisur hetimet për të zbardhur rrethanat e konfliktit në burg.
Hetimi synon të përcaktojë nëse përplasja ka qenë një konflikt i çastit mes të dënuarve apo nëse ngjarja ka qenë e organizuar ose e porositur.
Në kuadër të hetimeve është marrë në pyetje edhe Denis Bajri.
Sipas dëshmisë së tij, Gjini dhe Zoto e kanë thirrur dhe më pas e kanë sulmuar me mjete prerëse të improvizuara.