Shqipëri-Serbi: Ja masat e marra nga Policia (kyçen të gjitha lokalet)
Drejtoria e Policisë e Qarkut te Elbasanit ka marrë një sërë masash organizative në drejtim të sigurimit të rendit dhe qetësisë, për zhvillimin sa më normal të ndeshjes Shqipëri-Serbi, e cila do të zhvillohet më 8 tetor 2015, në ora 20:45, stadiumi “Elbasan Arena”.
Sa më sipër, në ora 08:00, të datës 08 tetor 2015, bëhet me dije se, do të bllokohen disa segmente rrugore. Kështu, do të bllokohet bulevardi “Qemal Stafa”, që fillon nga Posta deri në dalje të unazës për në Librazhd; bulevardi “Aqif Pasha”, që fillon nga 1 Maji deri tek ish-konservimi i vjetër deri tek Harullajt. Nuk do të lejohet parkimi i mjeteve nga rreth-rrotullimi i luleve deri tek rreth-rrotullimi i Zaranikës. Po ashtu, nuk do të lejohet parkimi i automjeteve përreth dhe përballë stadiumit, si dhe nuk do të lejohet lëvizja dhe parkimi i mjeteve në dy bulevardët kryesorë.
Sipas Policisë, hyrja e sportdashësve do të fillojë në orën 16:30 dhe do të mbarojë në orën 20:15, me qëllim shmangien e radhëve të gjata në hyrje për në stadium.
Për ndeshjen do të angazhohen 1500 punonjës policie, nga këto 308 punonjës policie do të jenë nga Drejtoria e Policisë se Qarkut Elbasan.
Të gjithë sportdashësit do të jenë të pajisur me kartë identiteti dhe nuk duhet të kenë me vete sende të forta, shishe (të çfarëdolloji), fishekzjarrë, monedha apo metale (të çfarëdolloji)
Në hyrje të stadiumit do të kontrollohen të gjithë sportëdashësit. Të gjitha lokalet që ndodhen në bulevardin “Aqif Pasha”, nga stadiumi deri tek Shatërvani, nga ora 12:00 dhe deri në përfundim të ndeshjes do të jenë të mbyllura. Në të gjitha ballkonet, ambientet dhe pallatet përreth stadiumit, nuk do të lejohen persona që nuk janë pjesëtarë të familjes.
Drejtoria e Policisë Elbasan i kërkon qytetarëve që të minimizojnë më datë 8 tetor 2015, lëvizjen e tyre me automjete brenda qytetit të Elbasanit, çka do të sillte një ndihmesë të madhe në zhvillimin sa më normal të këtij aktiviteti.