Shqipëria rrezikohet nga tërmete si në Itali

Edhe ne në vendin tonë rrezikohemi nga tërmete si në Itali. Sizmiologu shqiptar, Llambro Dumi, është shprehur se edhe vendi ynë rrezikon të goditet nga tërmete të madhësisë që goditi në orët e para të mëngjesit të sotëm Italinë Qendrore.

Në një komunikim telefonik në “News 24”, sizmiologu Dumi theksoi se e vetmja masë parandaluese që mund të marrim për raste të tilla është të ndërtojmë mirë.

“Jemi të rrezikuar nga tërmete të kësaj madhësie, në Shqipëri ka patur tërmete edhe 6.8 ballë. Duhet të përgatitemi, kam parasysh godinat tona.

Duhet të ndërtojmë mirë. Shkenca sot nuk është në gjendje t’i paralajmërojë, aq më tepër t’i parandalojë”, deklaroi Dumi.  Lidhur me tërmetin në Itali, sizmiologu shqiptar tha: “Zona që u godit nga tërmeti në Itali është shumë pranë Aquilas që u godit nga një tërmet i fortë në 2009-ën. Eshtë një zonë që fillon nga Reggio Emilia në veri, deri poshtë në Kalabri e njohur për tërmete. Në këtë zonë ka shumë ndërtime historike, monumente kulture. Pjesa me e madhe e rrënojave është nga ndërtime historike”.