Shqipëria, vendi i parë në Ballkan që hap një qendër për gay-t e pastrehë

Shqipëria ka hapur një qendër për homoseksualët e pastrehë, duke u bërë kështu vendi i parë në Ballkan dhe Europën Lindore, që e bën një gjë të tillë. Qendra do të mbajë emrin “Streha”.

Ajo është një projekt i dy organizatave për të drejtat e komunitetit gay, Alenaca LGBT dhe ProLGBT. Qendra do t’u ofrojë atyre strehim të përkohshëm (deri në 6 muaj) dhe shërbime, duke përfshirë edhe trajnime për aftësitë e tyre, mundësi të formimit profesional dhe mbështetje psiko –sociale.

Ministri i Mirëqënies Sociale dhe Rinisë z. Erion Veliaj, Ambasadori britanik në Shqipëri z. Nicholas Cannon OBE, zv.Ambasadori i SHBA z.Henry V. Jardine, drejtoresha në zyrën e programeve në USAID, znj. Clare Masson, drejtori ekzekutiv i Agjencisë për Mbështetjen e Shoqërisë Civile (AMSHC) z. Andi Kananaj, drejtoresha e “Assist Impact” znj. Mathy Timm dhe të tjerë miq, ishin vizitorët e parë të këtij ambienti.

Kristi Pinderi tha gjatë fjalës së tij se: “Dhunën ndaj komunitetit LGBTI në Shqipëri jo detyrimisht ne e shikojmë çdo ditë nëpër rrugë! Ajo është një dhunë sistematike që ndodh brenda familjes dhe në shkollë apo në ambientet e tjera publike, ndaj STREHA është mbi të gjitha një shërbim për viktimat LGBT të dhunës në familje”.