Situata në kufijtë e Shqipërisë nuk është ajo që duhet në këto ditë të pandemisë së Covid-19. Prej ditësh ata po jetojnë në qiell të hapur, pasi nuk po lejohen që të futen në atdhe. Avokati Adriatik Lapaj pretendon se ka dhjetëra nene konventash për të drejtat e këtyre shtetasve shqiptarë që po shkelen.
“Është shkelur kuadri ligjor vendas dhe ai ndërkombëtar. Përcaktohet qartë e drejta e qytetarëve për të mos u ndaluar që të kthehen në vendin e tyre. Referuar të gjithë konventave, është e pamundur që t’i ndalohet kthimi në vendin e tyre. Ata kanë ardhur në derën e vendit të tyre dhe në këto kushte shteti nuk duhet ta mbajë derën mbyllur. Shteti duhet të marrë masat e karantinimit, por jo të ndalojë hyrjen e shtetasve të tij”, tha Lapaj për A2.
Nga ana tjetër ai shtoi se po të ishin ministra, këta shtetas do të kishin hyrë. “Ministri i Jashtëm (Gent Cakaj) përcolli mjekët në Itali dhe u kthye në vend si zotëri, as nuk u karantinua. Këto nuk janë raste riatdhesimi. Edhe sikur të ishin të sëmurë, kush do t’i kurojë ata atje? Nuk mund të lihen në tokë neutrale”.
