Shqiptari kapet me 54 kg drogë në makinë

Policia rrugore e Barit ka arrestuar një qytetar shqiptar, në drejtimin e një ‘Renault Laguna’, pasi e ka kapur me 54 kile marijuanë në makinë.

Shqiptari, me banim në Italinë qendrore, është kapur gjatë një kontrolli rutinë të policisë në rrugë, teksa ka reaguar me nervozizëm e shqetësim nga prania e policëve.

Nervozizmi i tij ngjalli dyshime dhe bëri që policët ta ndalonin për kontroll. Rezultoi se ai është person me precedentë për shpërndarje droge, ndërkohë që ndaj tij kishte edhe një masë për heqje patente.

Marijuana u zbulua nga qeni Amira i marrë nga reparti i qenve të kuesturës së Barit për kontrollet e mjeteve në rrugë, të intensifikuara në sezonin e verës, për shkak të rritjes së numrit të automjeteve.

54 kilogramët e marijuanës ishin ruajtur në 26 qese plastike dhe të fshehura nën dyshemenë e bagazhit.

Droga e makina u sekuestruan, ndërsa drejtuesit të mjetit iu komunikua arresti në gjykatën e Barit.