Çmimet e karburanteve në Shqipëri kanë pësuar një tjetër rritje, me naftën që tashmë tregtohet deri në 229 lekë për litër, ndërsa benzina ka arritur në 219 lekë. Shtrenjtimi vjen në një periudhë tensionesh të forta në Lindjen e Mesme, të cilat kanë ndikuar drejtpërdrejt në tregjet ndërkombëtare të naftës.
Rritja e çmimeve në bursat e huaja u përshpejtua më 10 shtator, kur nafta Brent arriti deri në 110 dollarë për fuçi, nga rreth 100 dollarë më herët. Edhe pse çmimi është tërhequr në rreth 104 dollarë për fuçi, efekti i rritjes është reflektuar tashmë në tregun shqiptar.
Një tjetër tregues i rëndësishëm është çmimi Platts, i përdorur si referencë për zhdoganimin e karburanteve. Më 10 shtator, zhdoganimi u krye me 1,571 dollarë për ton, nga 1,446 dollarë më 8 shtator.
Nafta është rritur nga 219 në 229 lekë për litër, duke kaluar edhe nivelin e shënuar në mars, kur çmimi arriti në 226 lekë. Ndërkohë, benzina, e cila më parë shitej rreth 205 lekë, tashmë tregtohet në disa pika me 216 deri në 219 lekë për litër.
Rritja e çmimeve ka shtuar kostot për qytetarët, transportin publik dhe bizneset, por paralelisht ka sjellë edhe më shumë të ardhura për buxhetin e shtetit. Të dhënat për periudhën mars-korrik tregojnë se janë importuar rreth 305.8 mijë tonë karburante, vetëm 1.2 për qind më pak se një vit më parë.
Në të njëjtën periudhë, nga taksa doganore, akciza dhe TVSH-ja, buxheti ka arkëtuar rreth 20.2 miliardë lekë, ose 1.7 miliardë lekë më shumë se një vit më parë.
Në Shqipëri, përveç akcizës dhe TVSH-së 20 për qind, çmimit të karburantit i shtohen edhe taksa e qarkullimit dhe taksa e karbonit. Kjo bën që barra fiskale të zërë një pjesë të konsiderueshme të çmimit final që paguan konsumatori.