Shtyhen hetimet për 613 kg kokainë

Prokuroria për Krimet e Rënda, zgjat me 3 muaj afatet e hetimeve për dosjen e 613 kilogrameve kokainë të kapur shkurtin e kaluar në Maminas. Kështu, prokuroria kërkon 3 muaj shtesë për hetimet ndaj Armando Pezakut, shoferit të kamionit dhe menaxherit të firmës “Arbi Garden”, Donaldo Lushaj.

Krimet e Rënda kanë dërguar letërporosi sërish në Gjermani për marrjen e deklarimeve të Arbër Çekajt, ndërsa kërkesa për ekstradimin e tij në Tiranë ende nuk ka marrë përgjigje. Afati për këto hetime, skadoi ditën e djeshme, me 28 shkurt. Kokaina me vlerë 180 milion euro u nis me një kontenier nga Kolumbia dhe mbërriti më date 19 Shkurt të vitit 2018 në portin e Durrësit.

Kontenieri u mbajt disa ditë nën vëzhgim deri kur ngarkesa u mor në dorëzim nga “ArbiGarden”, kompani e cila kishte porositur banane. Droga ishte fshehur ne 528 pako të mbështjella me letër natriban me kode të vendosura nga trafikantët.