Situata në vend, Berisha: Është rritur kostoja e jetesës 60 për qind, si në asnjë vend tjetër

Sali Berisha thotë se në Shqipëri është rritur kostoja e jetesës me 60 për qind, si në asnjë vend tjetër në 5 vitet e fundit. Nga Foltorja para Kryeministrisë këtë të hënë, kreu i PD-tha akuzoi duke thënë se Rama e ka bërë Shqipërinë në një vend të pajetueshëm, ndërkohë që ai sipas tij po vjedh miliarda.

”Çdo ditë, mediat ndërkombëtare informojnë kombet e tyre me të vërtetat që ne denoncojmë. Me të vërtetat që ne mbrojmë. Me të vërtetat për të cilat ne ngrihemi dhe protestojmë. Tetë rezoluta ndërkombëtare damkosin regjimin e Tiranës. Damkosin një regjim, i cili varfëron shqiptarët me vjedhjet e tij çdo muaj.

60 përqind është rritur kostoja e jetesës në Shqipëri si në asnjë vend tjetër në 5 vitet e fundit. Si do jetojnë shqiptarët? E ka bërë Shqipërinë një vend të pajetueshëm, në një kohë kur me baxhanakun dhe vetë kanë vjedhur qindra e qindra milionë, personalisht ai miliarda. Por ne qëndrojmë. Ne jemi këtu të betuar, të pamposhtur në qëndresën tone”, tha Berisha.