Situatë e pazakontë në Kuvend. Berishës i ndërprenë fjalën, del “live” në Facebook

Një situatë e pazakontë ka ndodhur në parlamentin e Shqipërisë, ku deputetët e PD-së kanë vendosur të flasin me publikun nga foltorja nëpërmjet rrjeteve sociale, pasi drejtuesja e seancës Ermonela Felaj nuk u ka dhënë fjalën.

Pas kësaj situatë Berisha ka folur “live” nga Kuvendi nëpërmjet Facebook-ut: 

“Flet në emër të vasalit Vuçiç, të Putinit, lidhur me rubla ruse dhe përralla babushkash. E vërteta është se Rama është avokati i Vuçiçit, i Serbisë dhe se vëllezërit Karriç janë bashkaksioner me vëllezërit Rama në Portin e Durrësit. Të gjitha këto detyrojnë opozitën që të mbajë qëndrim tjetër në Kuvend. Këto detyrojnë opozitën që të thërrasë popullin të flasë në këtë parlament. Në rast se nuk flet populli, siç po flasin këta këtu, ky parlament nuk duhet të jetë. Sot do të jetë një ditë në lartësinë e 12 nëntorit, por shumë shpejt ajo datë do të kalohet nga protesta të tjera të fuqishme para parlamenti, në bulevardin e Tiranës. Europa dhe bota do të marrë vesh se hajdutët nuk do të sjellin kurrë stabilitet. Hajdutët nuk kanë moral, janë të aftë të kryejnë çdo akt ndaj popullit të tyre. Këto janë të vërtetat. Fikeni sa të doni ju mikrofonin, është mrekulli e FB që të më lejojë mua dhe çdo deputet të komunikojë me zgjedhësit e vetë”, tha Berisha.