“Skifterët” shqiptarë tallen me drejtësinë në Angli

E përditshmja ”The Telegraph”, edhe këtë javë ka shkruar për shqiptarët. Sipas artikullit, gangsterët shqiptarë po tallen me sistemin britanik të drejtësisë. Gazetarët kanë arritur të sigurojnë disa foto të postuara në llogaritë private në Instagram të “skifterëve” shqiptarë, të cilët dyshohet se janë autorë të një serie vjedhjesh të ndodhura në Londër, Kent dhe Sërrei.

“The Telegraph” shkruan se “skifterët” Fabion “Gucci” Kuçi dhe Azem “Ziro” Dajçi kanë filmuar dhe fotografuar veten brenda qelive në burgun “Wormwood Scrubs”, ku po presin të njihen me dënimin që do t’u jepet. Kuçi ka pranuar akuzat për vjedhje me dhunë ndërsa Dajçi gjithashtu ka pranuar fajësinë për të njëjtën akuzë por edhe mbajtje të armëve dhe municioneve.

“The Telegraph” ka zbuluar edhe fotografi të të dënuarve të tjerë shqiptarë, si Tristen Asllani, i dënuar me 25 vite burg për krime të lidhura me armët dhe narkotikët. Ndërsa Agron Demarku është dënuar me 63 vite burg për trafik vajzash të mitura disa prej të cilave 16-vjeç nga Lituania. Të dënuarit e tjerë që kanë bërë foto në Instagram janë Lulzim Zefi, i cili do të qëndrojë pas hekurave për 12 vite për trafik kokaine, si dhe Marsel Meco, i dënuar për pastrim parash.

Sokol Kalani, Shefi i Task-Forcës Anti-Skifter, ka thënë për “The Telegraph” se bashkëpunimi me autoritetet britanike në lidhje me bandat shqiptare është rritur. ”Shumica e kërkesave që kemi vijnë nga Italia dhe Gjermania por së fundmi kemi marrë kërkesa të shumta nga Mbretëria e Bashkuar për identifikimin dhe arrestimin e shqiptarëve që mund të jenë përfshirë në grabitje”.