Sot në Tiranë: Protestë e banorëve te “5 Maji”, forca policie, shembje ndërtesash dhe familje të rrënuara

Dita e sotme ka filluar me përplasje në kryeqytet. Eshtë parashikuar shembja e disa ndërtesave në zonën e “5 Majit”.

Policia ndodhet që në orët e para të mëngjesit. Banorët e kanë kundërshtuar këtë projekt që nga fillimi dhe prej gati 3 muajsh kanë zhvilluar protesta.

Policia ka rrethuar zonën dhe ka bllokuar çdo hyrje. Ndërkohë banorët duke mos gjetur zgjidhje po përplasen me policinë në këtë të ftohtë me diell.

Këto apartamente po shemben në kuadër të procesit të rindërtimit pas tërmetit të 26 Nëntorit 2019, ku në këtë zonë është hartuar një plan zhvillimor me blloqe të reja banesash. Sipas VKM-së, banorët shtëpitë e të cilëve janë parashikuar për t’u shembur, do t’u jepen apartamentet e reja që do të ndërtohen në këtë zonë. Por disa banorë e kundërshtojnë këtë projekt duke thënë se shtëpitë e tyre nuk kanë pësuar dëmtime.

Kjo javë pritet të sjellë mot të ftohtë deri në minus 8 gradë në Tiranë, ndaj duhet gjetur zgjidhje për këto familje.