”SPAK krenohet me denoncimet e mia”, Meta: Çështja CEZ-DIA është rihapur nga Rilindja

Kreu i Partisë së Lirisë, Ilir Meta thotë se ai nuk ka asnjë lidhje me marrëveshjen CEZ-DIA, duke i referuar paraqitjes së djeshme në SPAK për këtë çështje.

I ftuar në emisionin “Të paekspozuarit” në MCN Tv, Meta tha se kjo çështje riaktivizohet sa herë që Rilindja është në krizë. Po ashtu Meta shprehu zhgënjimin që SPAK-u nuk e ka thirrur për kallëzimet e shumta që ai ka depozituar aty, falë tij dhe PL-së.

“Sa herë të më thërrasë SPAK do shkoj. SPAK krenohet sot me denoncimet dhe kallëzimet e mia dhe të Partisë së Lirisë. Kam bërë disa kallëzime në SPAK. Edhe kur erdhi ftesa e prita me shumë kënaqësi se mendova se do ishte ndonjë nga kallëzimet që kam bërë me vjedhje miliarda euro. Mendova se ishte ndonjë nga ato çështje.

Sa i përket çështjes për të cilën u thirra, kam zero shqetësim sepse s’kam asnjë lidhje. Kjo çështje CEZ DIA nuk ka asnjë lidhje me Ilir Metën sepse kur është lidhur kjo marrëveshje nuk kam qenë unë ministër. U thirra thjesht si deklarues. Nuk ka dhe nuk mund të ketë asnjë shkresë dhe asnjë dokument që Ilir Meta të ketë cenuar një interes publik”, tha Meta.